WAZIRI DK. AKWILAPO AWATANGAZIA 'VITA' WANAOHODHI ARDHI, AIPONGEZA NHC

-

-Atishia kutumia Sheria Namba 113 kunyang’anya waliokaa na viwanja bila kuviendeleza.

-Ahimiza ujenzi wa nyumba nafuu kukabili upungufu wa nyumba milioni 3.8

Mwandhishi Wetu, daimatznews@gmail.com

Waziri wa Ardhi, Nyumba na Maendeleo ya Makazi, Dk. Leonard Akwilapo, ameanza kukunjua makucha, akieleza atawanyang’anya ardhi wote wanaohodhi bila kuziendeleza kwa muda mrefu, huku akilipongeza Shirika la Nyumba la Taifa kwa kuendeleza maeneo inayomiliki kwa kujenga miradi mbalimbali, hata kuzalisha faida ya Sh bilioni 58 kwa mwaka uliopita 2025.

 Akizungumza katika ufunguzi wa Mkutano Mkuu wa Baraza la Wafanyakazi wa NHC unaofanyika kwa siku tano kuanzia leo, Februari 11, 2026 jijini Arusha, Dk. Akwilapo, amesema anafikiria kuchukua hatua hiyo kwa kuzingatia sheria zilizopo.

 “Natafakari kutumia sheria yetu Namba 113 kifungu cha 49 kunyang’anya ardhi watu waliohodhi muda mrefu bila ya kuiendeleza. Maana sheria inataka mmiliki wa ardhi kuiendeleza sio kuihodhi. Wapo wanaohodhi kwa kujenga vibanda vya walinzi, tutanyang’anya hatutajali hilo kwani sheria inawataka kujenga nyumba sio vibanda vya walinzi,” amesema Dk.Akwilapo. 

Amesema wapo baadhi ya watu wanahodhi ardhi kubwa kwa kuziweka benki bila kuziendeleza wakati kuna watu wenye uhitaji wa ardhi ya kufanya uwekezaji wa nyumba bora za kisasa na miradi mingine ya maendeleo jambo alilosema sio sawa.

Amelikumbusha Shirika la Nyumba la Taifa wajibu wake kuhakikisha inafanya kila linalowezekana kujenga kuwawezesha wananchi kupata nyumba bora na za kisasa kwa gharama nafuu kwa kupunguza gharama za ujenzi.

“Suala la ujenzi wa nyumba bora za kisasa na gharama nafuu ni kipaumbele cha Serikali, kwa NHC mtambue kuwa kuna upungufu mkubwa wa nyumba za makazi nchini, unakifia nyumba milioni 3.8. Hii ni fursa ya biashara kwenu,” amesema Dk. Akwilapo na kuongeza; 

“Wananchi wakiangalia NHC wanaona nyumba bora, wanaona timu ya ushindi kufikia ndoto za makazi bora. Punguzeni gharama za ujenzi, ongezeni jitihada kujenga nyumba bora za gharama nafuu kwa wananchi.” 


Waziri Dk. Akwilapo amelipongeza Shirika la Nyumba la Taifa kwa utendaji mzuri uliowezesha kupata faida ya shilingi bilioni 58.86 kwa mwaka 2025 akieleza kuwa mafanikio hayo ni matokeo ya ushirikiano kati ya uongozi na wafanyakazi, na kwamba ni muhimu mshikamano huo ukaendelezwa. 

Dk. Akwilapo amewahimiza wafanyakazi kuwa na subira katika kipindi cha miezi sita kilichotengwa kwa ajili ya maboresho ya Mkataba wa Hali Bora, akisisitiza kuwa taratibu za kisheria na kiutawala lazima ziheshimiwe kabla ya mkataba kuwasilishwa na kuidhinishwa na mamlaka husika.

Baadhi ya wafanyakazi wa NHC wakifuatilia mkutano Mkuu wa Baraza la Wafanyakazi wa shirika hilo leo Februari 11, 2026 jijini Arusha.

Amesisitiza kuwa NHC ina wajibu mkubwa kwa Watanzania wa kuwapatia makazi bora na yenye gharama nafuu, jambo ambalo ni kipaumbele cha Shirika. 

Waziri Akwilapo pia ameeleza kuwa Wizara yake ipo tayari kushirikiana na NHC kwa kuwezesha uratibu na taasisi nyingine ili kurahisisha utekelezaji wa majukumu ya Shirika. 

 Amesisitiza umuhimu wa kuimarisha mifumo ya mapato, kukusanya kodi na kudai madeni kwa kuzingatia sheria, kanuni na miongozo iliyopo, ili kuhakikisha uendelevu wa kifedha wa Shirika. 

Katika kuimarisha utendaji, Dk Akwilapo amehimiza kukamilishwa kwa miradi kwa wakati ili kupunguza uhaba wa makazi nchini, pamoja na kuimarisha mifumo ya ndani ya usimamizi wa fedha ili kupunguza mianya ya upotevu wa mapato. 

 Alisisitiza pia kuimarishwa kwa utawala bora, kuondoa rushwa na uzembe, na kuzingatia maadili ya utumishi wa umma ikiwemo uwazi na uadilifu.

Awali, akimkaribisha Waziri Dk. Akwilapo, Mkurugenzi Mkuu wa NHC, Hamad Abdallah amesema katika mwaka uliopita wa 2025 shirika hilo limezalisha faida inayofikia shilingi 58.86 sawa na asilimia 138 ya lengo huku pia mizania yake ikikua.

"Faida kwa mwaka 2026 ni sh bilioni 58.86 na mizania ya NHC imeendelea kukua na kufikia takriban shilingi 6.4 trilioni kwa mwaka huu wakati mwaka uliopita tulipofanya mkutano kama huu, ilikuwa shilingi bilioni 5.5," amesema Hamad.

 

Maoni

Chapisha Maoni

Machapisho maarufu kutoka blogu hii

Sanamu ya Bikira Maria yaonekana ndani ya Hifadhi ya Taifa Saadani

-
Picha
  -Maajabu mapya ya kipekee Exuperius Kachenje Sanamu yenye mwonekano wa Bikira Maria (Mariam), anayetajwa na vitabu vitakatifu vya Biblia Takatifu na Qur’an Tukufu (Mariam), ndiye mama wa Yesu Kristo (Nabii Issa bin Mariam), imegundulika ndani ya Hifadhi ya Taifa ya Saadani, ikitajwa kuwa ni maajabu mapya yasiyo ya kawaida kwa watalii ndani na nje ya Tanzania, inayoongeza upekee wa hifadhi hiyo kwa utalii. Mti wa mbuyu wenye sanamu yenye mwonekano wa Bikira Maria uliopo ndani ya Hifadhi ya Taifa Saadan. Picha na Exuperius Kachenje Ofisa Mhifadhi kitengo cha uta;ii, Hifadhi ya Taifa Saadani (SANAPA) Daud Gordon amebainisha hayo Juni 26, 2025 akieleza kwamba kivutio hicho kipya ni nyenzo muhimu katika kukuza utalii wa kiimani, hata kuweza kuwa sehemu ya hija kwa waamini, hasa wanaoamini na kumheshimu mama huyo kadiri ya mapokeo ya imani zao,mfano ukiwa Kanisa Katoliki. Gordon amesema kuwa sanamu hiyo ya asili inaonekana katikati ya mti wa mbuyu, eneo la Buyuni  ndani ya h...
Endelea kusoma

Kapteni Traole afuata huduma za afya nchini

-
Picha
  - Aichagua JKCI kupata huduma za kibingwa  - Burkina Faso yasaini makubaliano na JKCI  Mwandishi Wetu, daimatznews@gmail.com Rais wa Burkina Faso,Kapteni Ibrahim Traore amefuata huduma bora za afya zinazotolewa nchini, hasa za magonjwa ya moyo. Rais wa Burkina Faso, Kapteni Ibrahim Traore Ndivyo unavyoweza kueleza, baada kiongozi huyo maarufu duniani,kutuma mwakilishi wake wa masuala ya afya Burkina Faso nchini kuzungumza na kutiliana saini hati ya makubaliano na Taasisi ya Moyo Jakaya Kikwete (JKCI), katika kutoa huduma bobezi ya matibabu ya  magonjwa ya moyo. Kwa mujibu wa JKCI, hati hizo zimesainiwa kati ya  Mkurugenzi Mtendaji wa Taasisi ya Moyo Jakaya Kikwete (JKCI), Dk. Peter Kisenge na Mshauri wa Rais wa Burkina Faso na Mratibu wa Kitaifa wa Mpango wa Afya wa Rais, Drissa Traore, jana jijini Dar es Salaam. Akizungumza baada ya kusaini makubaliano hayo, Dk. Kisenge amesema makubaliano hayo yataimarisha utoaji wa  huduma za matibab...
Endelea kusoma

Wawekezaji wa Oman watua nchini, wateta na NHC kuchochea mapinduzi sekta ya makazi

-
Picha
Mwandishi Wetu,daimatznews@gmail.com Tanzania imepiga hatua isiyosahaulika katika historia ya maendeleo yake, baada ya kikosi cha wawekezaji wa ngazi ya juu kutoka Ufalme wa Oman, kufanya ziara nchini na kukutana na uongozi wa Shirika la Nyumba Tanzania (NHC), wakifungua fursa kubwa za mabadiliko makubwa katika sekta ya nyumba na maendeleo ya miji nchini. Ujumbe wa Wawekezaji kutoka Oman(kulia) ukiwa katika mkutano na uongozi wa Shirika la Nyumba la Taifa (NHC), (kushoto), makao makuu ya shirika hilo jijini Dar es Salaam Mei 20,2024. Ujumbe huo uliongozwa na Balozi wa Oman nchini Tanzania, Saud Al Shidha, ulikuwa na malengo kadhaa ya kukuza ushirikiano wa kiuchumi ikiwamo kuanzisha mabadiliko ya kimkakati, yatakayochochea ukuaji wa sekta ya makazi kwa njia ya ubia wa kimataifa. Katika kikao cha kihistoria kilichofanyika Makao Makuu ya Shirika la Nyumba la Taifa (NHC) – Kambarage House, ujumbe wa Oman ulipokelewa na Mkurugenzi Mkuu wa NHC, Hamad Abdallah, pamoja na viongozi waandamizi w...
Endelea kusoma