Papa Leo XIV: Uhuru wa kidini ni nguzo ya amani duniani

-

 -Alipongeza Shirika la Misaada kwa Kanisa kwa Kutetea Uhuru wa Kidini

Roma, Italia. Kiongozi wa Kanisa Katoliki Duniani, Baba Mtakatifu Leo XIV amesema vitendo vya uhasama na vurugu dhidi ya watu wanaoshikilia imani na mitazamo tofauti, wakiwemo Wakristo vinaongezeka duniani na kwamba hakutakuwa na amani bila uhuru wa dini.

Papa Leo wa XIV akibariki msalaba wakati wa mkutano na shirika la Aid to the Church in Need (CAN)Oktoba 10, 2025.

Baba Mtakatifu Leo XIV ametoa kauli hiyo katika hotuba yake alipokutana na wanachama wa shirika la kipapa Aid to the Church in Need International (CAN), ambao umefanyika Oktoba 9-2025, siku chache kabla ya kuchapishwa kwa Ripoti ya Uhuru wa Kidini Duniani itakayozinduliwa rasmi Oktoba 21 mwaka huu.

Akinukuu maneno ya Papa Francis, Papa Leo amesema, “Hakutakuwa na amani bila uhuru wa dini, uhuru wa kufikiri, uhuru wa kujieleza, na heshima kwa maoni ya wengine.”

Alisisitiza kuwa Kanisa Katoliki linatetea uhuru wa kidini kwa watu wote, akirejelea tamko la Mtaguso wa Pili wa Vatikano lililosisitiza kwamba uhuru wa kidini ni haki inayopaswa kutambuliwa na kila taifa.

Amesema kuwa uhuru wa kidini ni nguzo ya jamii kwa sababu unalinda nafasi ya kimaadili inayomwezesha mwanadamu kutumia dhamiri yake kwa uhuru

“Uhuru huu unamwezesha mtu binafsi na jamii kutafuta ukweli, kuuishi kwa uhuru, na kuushuhudia waziwazi,” amesema na kuongeza;

 “Uhuru wa kidini si haki ya kisheria tu au upendeleo tunaotunukiwa na serikali, ni hali ya msingi inayowezesha upatanisho wa kweli.”

Baba Mtakatifu LeoXIV ameonya kwamba uhuru wa kidini unapominywa, jamii huingia kwenye hatari ya kushuhudia kuvunjika kwa uhusiano wa kimaadili na kiroho.

Katika hotuba yake, Papa Leo XIV amerejea kwamba ziara ya wanachama wa ACN mjini Roma inafanyika wakati ambapo kunaongezeka kwa vitendo vya uhasama na vurugu dhidi ya watu wanaoshikilia imani na mitazamo tofauti, wakiwemo Wakristo.

“Utume wa ACN unasimama kinyume na hali hiyo ya vurugu na Kanisa haliwezi kamwe kuwaacha ndugu na dada zetu wanaoteswa kwa ajili ya imani yao,” amesema Papa Leo XIV.

Kiongozi huyo wa Kanisa Katoliki Duniani, amesisitiza kwamba; “Haki ya kila mtu kuwa na uhuru wa kidini “si hiari bali ni haki ya msingi,” akiongeza kuwa kila binadamu hubeba ndani yake “tamaa ya kina ya kutafuta ukweli, maana ya maisha na ushirika na wengine pamoja na Mungu.”

Ameeleza kuwa uhuru wa kidini umejengwa juu ya heshima ya utu wa mwanadamu, aliyeumbwa kwa sura ya Mungu na kupewa akili na uhuru wa kuchagua.

Papa Leo amekumbusha kuwa Aid to the Church in Need ilianzishwa mwaka 1947 kama mwitikio wa mateso ya vita, lengo likiwa kukuza msamaha na upatanisho, huku likitoa sauti kwa Kanisa popote linapoteseka au kutishiwa.

Alisifu Ripoti ya Uhuru wa Kidini Duniani inayochapishwa kila baada ya miaka miwili, akieleza kuwa ni nyenzo muhimu ya kuongeza uelewa na kufichua “mateso yaliyofichika ya watu wengi.”

Papa pia aliwashukuru wanachama wa ACN kwa msaada wao wa kifedha kwa taasisi za Kanisa duniani kote, hasa katika Jamhuri ya Afrika ya Kati, Burkina Faso, na Msumbiji.

“Popote ambapo Aid to the Church in Need inajenga upya kanisa, inasaidia watawa, au inasaidia kituo cha redio au usafiri,” alisema, “mnatia nguvu maisha ya Kanisa na muundo wa kiroho na kimaadili wa jamii.”

Papa Leo XIV alihitimisha kwa kusema kuwa msaada kwa Wakristo wa ndani unawasaidia wachache hao kuwa wajenzi wa amani katika nchi zao, wakawa “ishara hai ya maelewano ya kijamii na undugu, wakionyesha kwa majirani zao kuwa dunia tofauti inawezekana.”

Maoni

Chapisha Maoni

Machapisho maarufu kutoka blogu hii

Sanamu ya Bikira Maria yaonekana ndani ya Hifadhi ya Taifa Saadani

-
Picha
  -Maajabu mapya ya kipekee Exuperius Kachenje Sanamu yenye mwonekano wa Bikira Maria (Mariam), anayetajwa na vitabu vitakatifu vya Biblia Takatifu na Qur’an Tukufu (Mariam), ndiye mama wa Yesu Kristo (Nabii Issa bin Mariam), imegundulika ndani ya Hifadhi ya Taifa ya Saadani, ikitajwa kuwa ni maajabu mapya yasiyo ya kawaida kwa watalii ndani na nje ya Tanzania, inayoongeza upekee wa hifadhi hiyo kwa utalii. Mti wa mbuyu wenye sanamu yenye mwonekano wa Bikira Maria uliopo ndani ya Hifadhi ya Taifa Saadan. Picha na Exuperius Kachenje Ofisa Mhifadhi kitengo cha uta;ii, Hifadhi ya Taifa Saadani (SANAPA) Daud Gordon amebainisha hayo Juni 26, 2025 akieleza kwamba kivutio hicho kipya ni nyenzo muhimu katika kukuza utalii wa kiimani, hata kuweza kuwa sehemu ya hija kwa waamini, hasa wanaoamini na kumheshimu mama huyo kadiri ya mapokeo ya imani zao,mfano ukiwa Kanisa Katoliki. Gordon amesema kuwa sanamu hiyo ya asili inaonekana katikati ya mti wa mbuyu, eneo la Buyuni  ndani ya h...
Endelea kusoma

Kapteni Traole afuata huduma za afya nchini

-
Picha
  - Aichagua JKCI kupata huduma za kibingwa  - Burkina Faso yasaini makubaliano na JKCI  Mwandishi Wetu, daimatznews@gmail.com Rais wa Burkina Faso,Kapteni Ibrahim Traore amefuata huduma bora za afya zinazotolewa nchini, hasa za magonjwa ya moyo. Rais wa Burkina Faso, Kapteni Ibrahim Traore Ndivyo unavyoweza kueleza, baada kiongozi huyo maarufu duniani,kutuma mwakilishi wake wa masuala ya afya Burkina Faso nchini kuzungumza na kutiliana saini hati ya makubaliano na Taasisi ya Moyo Jakaya Kikwete (JKCI), katika kutoa huduma bobezi ya matibabu ya  magonjwa ya moyo. Kwa mujibu wa JKCI, hati hizo zimesainiwa kati ya  Mkurugenzi Mtendaji wa Taasisi ya Moyo Jakaya Kikwete (JKCI), Dk. Peter Kisenge na Mshauri wa Rais wa Burkina Faso na Mratibu wa Kitaifa wa Mpango wa Afya wa Rais, Drissa Traore, jana jijini Dar es Salaam. Akizungumza baada ya kusaini makubaliano hayo, Dk. Kisenge amesema makubaliano hayo yataimarisha utoaji wa  huduma za matibab...
Endelea kusoma

Wawekezaji wa Oman watua nchini, wateta na NHC kuchochea mapinduzi sekta ya makazi

-
Picha
Mwandishi Wetu,daimatznews@gmail.com Tanzania imepiga hatua isiyosahaulika katika historia ya maendeleo yake, baada ya kikosi cha wawekezaji wa ngazi ya juu kutoka Ufalme wa Oman, kufanya ziara nchini na kukutana na uongozi wa Shirika la Nyumba Tanzania (NHC), wakifungua fursa kubwa za mabadiliko makubwa katika sekta ya nyumba na maendeleo ya miji nchini. Ujumbe wa Wawekezaji kutoka Oman(kulia) ukiwa katika mkutano na uongozi wa Shirika la Nyumba la Taifa (NHC), (kushoto), makao makuu ya shirika hilo jijini Dar es Salaam Mei 20,2024. Ujumbe huo uliongozwa na Balozi wa Oman nchini Tanzania, Saud Al Shidha, ulikuwa na malengo kadhaa ya kukuza ushirikiano wa kiuchumi ikiwamo kuanzisha mabadiliko ya kimkakati, yatakayochochea ukuaji wa sekta ya makazi kwa njia ya ubia wa kimataifa. Katika kikao cha kihistoria kilichofanyika Makao Makuu ya Shirika la Nyumba la Taifa (NHC) – Kambarage House, ujumbe wa Oman ulipokelewa na Mkurugenzi Mkuu wa NHC, Hamad Abdallah, pamoja na viongozi waandamizi w...
Endelea kusoma